Thursday, February 22, 2018

அந்தி வானமும் ஏரியும்

அந்திவானம்

மகனுடைய ஊரில் தினமும் 
காலை மாலை வானத்தின் அழகைப் பார்ப்பது மிகவும் பிடித்த பொழுது போக்காய் இருந்தது . காலைக் கதிரவனின் தோற்றத்தையும், மாலை சூரியன் மறையும் போது வானம் செவ்வானமாய் மாறுவதையும் கண்டு மகிழ்ந்தேன் . அதில் சில உங்கள் பார்வைக்கு.

இங்கே கொடுக்கப் பட்டு இருக்கும் படங்கள் எல்லாம் மாலையில் எடுத்த படங்கள்.
சிறு பறவைகள்   கூடு திரும்புது
சிவக்கத் தொடங்கி விட்டது
நடைப்பயிற்சி செய்யும் போது எடுத்த படம்


காரில் போகும் போது எடுத்த படம்

மகன் வீட்டுக்கு எதிபுறம் உள்ள வீடு


மஞ்சள் வெயில்  மாலை

கைகள் வணக்கம் சொல்லும் செங்கதிரவனைக் கண்டு
மலை வாயில் சூரியன்
அந்தி வானமும் அந்தி விளக்கும்

இருளும் ஒளியும்
உதிக்கிறதா? மறைகிறதா ? என்ற மாயத் தோற்றம் தருகிறது

மஞ்சளும் கறுப்பும் சேர்ந்த இருட்டு ,நடைபாதையை  ஆக்கிரமித்த காட்சி.



கடை வளாகத்தின் அருகில் இருந்த மலையையும் அந்தி வானத்தையும் நான் ரசிப்பதைப் பார்த்த என் மகன்  பக்கத்தில் ஒரு இடம் இருக்கு . அங்கு சென்று
சூரியன் மறைவதைப் பார்க்கலாம் என்றான். உடனே லேக் ப்ளெசெண்ட்
 ( LAKE PLEASENT ) என்ற இடத்திற்குச் சென்றோம்

இந்த இடம்  பீனிக்ஸிலிருந்து 35 மைல் தூரத்தில் இருக்கிறது.

சூரியன்  மறைவதைப் பார்க்கவே அந்த இடம் அடையாளப்படுத்தப் பட்டுள்ளது. மக்கள், குடும்பத்துடன் நட்புகளுடன் வந்து இருந்தார்கள். நாங்கள் கொஞ்சம் தாமதமாய்ப்போய் விட்டோம். சூரியன் மறைய ஆரம்பித்து விட்டது.      சூரியன் மறையும் நேரம் ஏரியைச் சிவப்பாய்க் காட்டுமாம். நாங்கள் தாமதமாய்ப் போனதால் கொஞ்சம் சிவப்பபாய்
இருந்தது.

இங்குள்ள எரி 10,000 ஏக்கர் நீர்ப் பரப்பு  உள்ளது. கொலராடோ ஆற்றிலிருந்து நீர் திருப்பிவிடப்பட்டு  அணைகட்டித் தேக்கி வைத்து இருக்கிறார்கள்.
260 அடி ஆழம் இருக்கிறது. 700 வண்டிகள் (கார்கள்) நிறுத்த வசதி உள்ளது.

365  நாளும் திறந்து இருக்கும் . 24 மணி நேரமும் உண்டு . குடும்பத்துடன்
 பிக்னிக் போக  ஏற்ற இடம்.வேகமாய் மோட்டார்ப் படகு ஓட்டுபவர்களுக்கு இந்த ஏரி மிகவும் உற்சாகம் தருமாம். காரில்  படகைக் கட்டிக் கொண்டு வருகிறார்கள்.  சொந்தப் படகு இல்லாதவர்களுக்கு வாடகை போட் கிடைக்கும். மீன் பிடிக்கலாம், பிடித்த மீனை அங்கே சமைத்து சாப்பிடுவார்களாம்.பாதுகாப்பான இடம் என்பதால் கூடாரம் அமைத்து அங்கே தங்குவார்களாம். இரவு நிலவொளியில் படகு சவாரி செய்வார்களாம்.

காலை முதல் மாலை வரை அங்கு இருக்க ஒரு காருக்கு 6 டாலர் வசூல் செய்கிறார்கள்.

கழுகு போன்ற பறவைகள் நிறைய இருக்கிறது என்கிறார்கள் . நாங்கள் போனபோது பறவைகளைப் பார்க்க வில்லை,  கூடு திரும்பும் நேரம் ஆகி விட்டதால் போலும்.


 .அங்கு எடுத்த படங்கள் அலை பேசியில் எடுத்த படம். காமிரா கொண்டு போகவில்லை, திடீர் என்று போனதால்.





குடும்பத்துடன் வந்து இருந்தார்கள் 
ஏரியின் அழகு, நீலவானம், செவ்வானம், நிலவும் தெரிய ஆரம்பித்து விட்டது.
மலை, செவ்வானம், ஏரி

இருட்ட ஆரம்பித்தவுடன் வீடு திரும்பினோம்.
                                                                           வாழ்க வளமுடன்.

Thursday, February 15, 2018

துள்ளித் திரிந்த முயலொன்று


மகன் ஊரில் (பீனிக்ஸ்) தினம் காலை  மகன் வீட்டைச் சுற்றி உள்ள நடைபாதையில்   நடைப்பயிற்சி மேற் கோள்வோம் நாங்கள் இருவரும். பறவைகள், முயல்கள் இவற்றைப் பார்ப்போம் நாள் தோறும் அவற்றின்  ஒலியும் காலைச்சூரியனின் வருகையும் மனதுக்கு மகிழ்ச்சி அளிக்கும் நாள் தோறும்.

பாலைவனப் பகுதியில் பறவைகள், முயல்கள் எல்லாம் மண் கலரில் தான் இருக்கும். நம் ஊரில் வீடுகளில் வளர்க்கும் வெள்ளை, கறுப்பு முயல்களைப் பார்க்கவே  இல்லை அங்கு. இயற்கை அமைப்புக்கு ஏற்றாற் போல் இறைவன் 
  அவற்றின் பாதுகாப்புக்கு கருதி  அந்த நிறத்தில் படைத்திருக்கிறார்.

தினம் படம் எடுக்க நிற்காது. நாம் வரும் சத்தம் கேட்டதும் புதரிலிருந்து துள்ளி ஓடும்.

தள்ளி போய் ஒரு பார்வை பார்க்கும் மீண்டும் ஓடி புதரில் மறைந்து விடும்.

தினம் ரோட்டை  கடந்து ஓடும்
அந்த பக்கம் போய் பார்வை பார்க்கும்
ஒரு நாள் காலை நடைப்பயிற்சிக்கு போனபோது   ரோட்டில் அடிபட்டு இறந்து போய் முயல் கிடந்தது. காலை போன ஏதோ காரில் அடி பட்டு இருக்கிறது.
பார்த்து மிகவும் மனது கஷ்டப்பட்டது. நேற்று வரை  துள்ளிக் குதித்து ஓடி எங்களுக்கு மகிழ்ச்சி அளித்த முயல் இப்படிக் கிடப்பதைப் பார்த்து மிகவும்   வேதனை ஆகி விட்டது.  அதை அடித்து சென்ற முக தெரியாத ஆளின் மேல் கோபம் வந்தது, கவனமாய் போய் இருக்கலாம் என்று.

முயலும் அவர் எதிர்பார்க்காத நேரத்தில் பாதையை கடந்து இருக்கலாம்.


தினம் பார்த்து கொண்டு இருந்த நண்பனைப் பிரிந்த சோகம் மனதில் குடி கொண்டது.  மறு நாள்  நடைப்பயிற்சி போகும்போது இறைவா! அந்த முயலுக்கு ஏற்பட்டது போல் மற்ற முயலகளுக்கு ஏற்படக் கூடாது என்று பிரார்த்தனை செய்து கொண்டு போனேன்.

Monday, February 12, 2018

ஹாலிவுட் பூங்கா

லாஸ் ஏஞ்சல்ஸ் போகும் போது வழியில்    ஹாலிவுட்  என்று மலையின் மீது  அடையாளப்படுத்தி இருக்கும் இடத்திற்கும் அங்கு அமைக்கப்பட்டு இருக்கும் பூங்காவிற்கும் 06/11/2017ல்போய் வந்தோம். 

ஹாலிவுட் எனப்படும் இடம் அமெரிக்காவின் லாஸ் ஏஞ்சலஸ் (Los Angeles) நகரின் ஒரு பகுதியாகும். இவ்விடத்தில் அமெரிக்காவின் பல முன்னணித் திரைப்பட நடிகர்கள் வாழ்வதாலும் பல திரைக்கூடங்கள் (studio) அமைந்துள்ளதாலும் அமெரிக்கத் திரைப்படத்துறை பொதுவாக ஹாலிவுட் என்றழைக்கப்படுகிறது.


    மேலும் ஹாலிவுட் செய்திகள் படிக்கலாம்.



வார இறுதி நாளில் இது போன்ற இடங்களுக்கு நல்ல கூட்டம் வருகிறது . குடும்பத்தினருடனும் , தங்கள் வளர்ப்பு செல்லங்களுடன் (நாய்கள்)
வருகிறார்கள்.
நாய்களுடன் விளையாடிக் களிக்கிறார்கள்.   நாய் செய்யும் அசுத்தங்களை அப்புறப்படுத்திவிட வேண்டும் அன்பு வேண்டுகோளையும் அறிவிப்பு பலகையாக வைத்து இருக்கிறார்கள்.
தூரத்திலிருந்து  மலை அழகு 
வீடுகள் அழகாய் இருந்தன மலையடிவாரத்தில்



பார்க்கில்  அமெரிக்க நச்சுபாம்பு இருப்பதாய் 
 எச்சரிக்கை  போட்டு இருந்தார்கள்
தாத்தாவும் பேரனும்  குழாய் போனில் பேசி மகிழ்கிறார்கள்
எங்கே இருக்கே?

மலைகளை அடுக்கி வைத்தது போல் படி

குட்டிப் பிள்ளைகள் சறுக்கி விளையாடுவது 
நான் குட்டி பிள்ளை இல்லையே !
மரம் ஊஞ்சலைக் காவடி சுமந்து கொண்டு இருக்கிறது

சறுக்கு விளையாட நிழல்தரும் குடைக்குக் கீழ்
நானும் விளையாட வருகிறேன்
நம் ஊர் பாண்டி போல் இருக்கு
பழைய டயரை வைத்தும் அழகு படுத்தி இருக்கிறார்கள்.

சதுரங்கக் காய்கள் கொண்டு வந்து விளையாடலாம்
அமர்ந்து விளையாட வசதியாக ஆசனங்கள்


காளான் போல ஆசனங்கள்
பயண அனுபவங்கள் தொடரும்.
வாழ்க வளமுடன்.
=======================